Во скопската населба Топанско Поле секојдневна слика стануваат паркираните возила на тротоарите и пешачките патеки. Граѓаните реагираат дека практично нема простор за безбедно движење, особено за децата и постарите лица кои се приморани да излегуваат на коловозот, изложувајќи се на сериозен ризик.
Фотографии направени на лице место сведочат за целосна узурпација на тротоарите, при што возилата се паркирани по целата должина на улиците. Жителите алармираат дека состојбата е алармантна и бараат итна реакција од надлежните институции – Град Скопје, општината и полицијата.
„Ова е секојдневен хаос. Децата кои одат на училиште мораат да одат по улица, а возачите ретко кога запираат. Не сакаме да се случи несреќа за да се преземе нешто,“ велат загрижени родители од населбата.
Граѓанските апелираат дека ваквото непрописно паркирање не смее да се толерира и дека е потребна редовна контрола, казни и воспоставување јасни правила за паркирање.
Жителите бараат ургентно решавање на проблемот со соодветни паркинг-простори, а дотогаш институциите да обезбедат пешаците да можат безбедно да се движат по своите патеки.
